「為全港市民 摒除行業利益」 直通巴聯會唔理生意撐高鐵
[2018.04.07] 發表
【明報專訊】立法會《廣深港高鐵(一地兩檢)條例草案》委員會 ，今日朝9晚8會辦公聽會，畀報咗名嘅人就一地兩檢表態。高鐵預計今年第三季通車，按道理跨境直通巴都算係受衝擊最大嘅行業之一，但「中港澳直通巴士聯會」就向委員會提交意見書，話高鐵雖然直達西九龍，會嚴重打擊佢哋嘅客源，但都要支持一地兩檢。
中港澳直通巴士聯會副董事長兼秘書長陳宗彝喺信中臚列咗八大理由，包括高鐵碳排放較低、可以直達市中心、實施一地兩檢可以引入多啲高端旅客等，可以帶動香港社會經濟效益，所以「本會會員雖然認為高鐵直達西九龍將嚴重打擊跨境巴士的客源，但為着全港市民的社會效益，本會必要摒除行業的經濟利益，鼎力支持特區政府將西九龍高鐵站實施一地兩檢」。
Emily同陳宗彝傾過，佢話高鐵對行業衝擊的確會好大，但長遠睇對香港旅遊業有好處，而直通巴其實都可以分一杯羹，例如同珠海、澳門、深圳合作，去高鐵站接啲旅客，經港珠澳大橋搞返個「4地聯遊」。佢又話，香港啲官員眼光唔夠長遠，運房局拎出嚟嘅論據又唔夠多，所以要出嚟發聲，用咗一個上晝搜尋資料，再傳畀會員睇，雖然都有啲同業唔撐高鐵，但又無人強烈反對，佢就將份意見書交咗畀立法會喇。
更多港聞
【明報專訊】佔中發起人、港大法律系副教授戴耀廷近日因為講中國結束專政後，香港可考慮獨立建國，之後政府、中聯辦等都出嚟譴責。晉身全國政協常委嘅...
詳情
相關新聞
