被問港獨言論風波 陳馮：咩叫戴耀廷
[2018.04.07] 發表
【明報專訊】佔中發起人、港大法律系副教授戴耀廷近日因為講中國結束專政後，香港可考慮獨立建國，之後政府、中聯辦等都出嚟譴責。晉身全國政協常委嘅世衛前總幹事陳馮富珍噚日出席兩會分享會後被問到呢件事，就反問記者「咩叫戴耀廷」，話自己唔識呢個人同相關事件，所以唔評論。
不過，佢就話香港係中國一部分，係不可否認嘅事實，佢呼籲如果年輕人想爭取啲咩都應該「坐低慢慢講」，搞對話而唔係搞對抗，爭取用和平嘅方法處理。
佢喺分享會上提到，無可否認過去20年因種種原因，令年輕人對國家觀念薄弱，但唔可以怪晒年輕人，家長、教師同社會賢達應該製造機會畀年輕人重新認識國家，呼籲年輕人去內地睇睇。
陳太又主動同記者講，感謝大家畀佢以70歲之齡做政協常委，希望用自己嘅國際經驗為香港同國家做事；好多香港傳媒都想同陳太做訪問，不過陳太同Emily講自己太耐冇返香港，冇助手、冇卡片，所以唔留聯絡電話、email，又話𠵱家所有嘢都係政協嗰邊幫佢安排。
更多港聞
相關新聞
