【明報專訊】香港專上學生聯會(學聯)去年決定收番位於旺角金輪大廈嘅「學聯社會運動資源中心」(又稱「自治八樓」)，不過，自治八樓使用者至今都未遷出單位，學聯決定今日開始截斷「自治八樓」嘅供電，亦已出律師信要求使用者喺21日內要離開單位同交出鑰匙。 學聯秘書長李軒朗同Emily講，「自治八樓」嘅電費一直都由學聯支付，𠵱家截電係要使用者自己負責。佢又話，日後單位嘅新使用者，都係要自己申請電力供應同交電費。 學聯代表會喺舊年已經要求佔用單位者要喺2017年9月30日或以前離開。當時「自治八樓」成員發聲明譴責學聯，斥學聯未有諮詢學界下，單方面收回單位，明言會抵抗，直到同學聯達成共識。但至今「自治八樓」成員仍未遷出單位，李軒朗話，目前仲未收回單位鑰匙，無辦法入去單位睇室內情况，又指學聯無主動聯絡自治八樓使用者，係「因為唔知對口，或者負責人係邊個」。 Emily打咗去「自治八樓」，無人聽電話。「自治八樓」早前另行將「學聯社運資源中心」註冊為社團，不過學聯已經發聲明強調社團與學聯無關。
|
| |
| |
;)
