【明報專訊】曾經登上珠穆朗瑪峰，又征服有海上珠峰之稱嘅「西北航道」，香港機電工程師朱棋端今年4月繼續揸住佢架帆船「探索鷹號」，開始第二次海上旅程。由愛爾蘭出發，經歐洲西岸入地中海，喺埃及入紅海，仲去過出名多海盜嘅索馬里海域，航行超過30個地方，完成環球之旅，噚日下晝返到香港。朱棋端話以前個人好執著，但去完咁多個地方，同過唔同船員合作，又要成日面對天氣同零件損壞，個人都變得寬容咗。 日揸16個鐘 「好似返工」 上一次出海，朱棋端駛過西北航道，佢話今日比上次輕鬆，多咗時間玩，不過都有好多驚險情節！例如要經過索馬里水域，好彩最後有中國海軍護航。跟住喺阿曼塞拉萊碼頭落帆船個陣跌落海兼撞傷胸部、頸同下顎，成個半月後先好番。最後一程由越南返香港，因為吹東北季候風，船要逆風行，每日只行到70海里；其中有次遇到風力達8級嘅季候風，兩個船員暈到揸唔到船，佢一個人一日揸足16個鐘；原本計劃只係用7日嘅航程，最後用咗21日先返到。 同伴爭執 被嘲爛船 Emily問朱棋端有無覺得好嬲同好無助嘅時候，佢話第一次去大西洋，同行船員要去唔同地方玩，但佢知道如果遲咗起行，之後會遇到好惡劣嘅天氣，大家就嘈起上嚟，有人直頭話鬧佢架船「係一架爛船」。佢又呻話航海好辛苦，「每日都好似返工咁」，要搵唔同地方嘅資料，又要維修。可能有人會話佢有錢先有得咁任性，朱棋端都認的確要用好多錢，但佢話如果好有熱誠去做一件事，會吸引到其他人幫手，佢仲同Emily講下一步諗住挑戰揸飛機。
|
| |
| |
;){kind=small}
;)
