【明報專訊】被譽為「技能界奧林匹克」嘅「世界技能大賽」上月結束，今屆港隊派出22名年輕選手參加20項比賽，最終奪得1面銅牌同7個優異獎章。發展局長黃偉綸噚日喺網誌鼓勵參賽者，話非常欣賞佢哋勇於挑戰自我，日前仲邀請建造業議會同機電署派出嘅6名選手分享參賽經驗同成果。

22年輕選手阿布扎比較勁

佢透露，建造業議會喺參賽前，特別邀請「神奇小子」曹星如及「包山王」黎志偉等星級導師，教導選手點樣加強臨場自信心，而成績係其次，最重要係青年人有機會衝出香港遠赴阿布扎比，唔止長見識，仲識到一大班同業好友，觀摩到其他國家嘅高水平技能。

黃偉綸話，目前建造業約有四成註冊技工已經55歲或以上，喺未來5至10年陸續退休，為吸引更多新人入行，政府喺2010年起撥款共4.2億元，支持建造業議會加強培訓本地建造業人員；而有調查發現，有興趣入行嘅年輕人比率，由2011年嘅8%大升至今年嘅逾24%。佢話無論建造業或機電行業均求才若渴，希望有更多青年加入。