【明報專訊】運輸及房屋局長陳帆噚日被問及喺私家車數量仍然好多下，政府係咪需要檢討新車牌發出制度時提到買樓，話後生仔買唔到樓但又想有自己空間，所以會買架車，「讓個軀體同個靈魂可以出去遊走一下」。唔少年輕議員都對呢番言論有反應，有人話觀察到的確有年輕人因為覺得買樓係妄想，所以買部車玩吓算；亦有人話局長離地。

工聯會陸頌雄話，局長應該諗吓方法，提供後生仔負擔得起嘅樓，話如果後生仔買到樓，自然會減少買車，咁樣車位不足及塞車問題都可以紓緩喎。

公民黨楊岳橋就批評陳帆言論離地，佢反問「陳局長你知唔知而家啲車位幾錢一個？租金幾多錢？有冇聽過買車容易養車難？」

年輕區議員民建聯顏汶羽及新同盟鍾錦麟都話，據佢哋觀察，確有後生選擇去買車，但話停車場費等養車開支好大，唔係太多人負擔得起。有車一族嘅鍾錦麟就話，買車買樓係個人選擇，不過年輕朋友對汽車有興趣，係佢哋社交圈子一部分。但如果陳帆局長講到要控制私家車增長，就唔應該特別針對年輕人買車，應該研究不同階層嘅人揸車嘅原因同模式。

陸頌雄﹕多咗holiday driver

顏汶羽就話，局長關注年輕人買車，不如用心研究起多啲青年宿舍。佢話後生仔想有自己嘅生活空間，如果收佢哋千幾蚊租金，起碼佢哋有自己空間，又可以幫青年儲錢，日後佢哋就可以自己置業。

最近考到車牌同買車嘅陸頌雄話，十年八年前天水圍屋邨停車場唔難搵車位，但𠵱家多咗好多車，睇到唔少後生仔做holiday driver。佢話後生仔見到樓價不斷升，買樓由理想變妄想同幻想，倒不如將積蓄拎去買車或旅行。佢話政府應諗方法，如將綠置居等定價定低啲，提供置業希望，咁大家自然會拎錢去供樓而唔係供車。