【明報專訊】唔少市民、團體都會趁行政會議開會前去示威區遞信、表達訴求，噚日公民黨前議員陳家洛就同一班南區街坊手持「還海濱於民 反對利南道住宅項目」標語，喺示威區請願，點知特首梁振英(CY)就向家洛多次批評，家洛引述CY問佢：「呢度係五星紅旗飄揚嘅地方，你喺度做乜嘢？」

梁前後問3次 陳指挑釁

家洛話，CY到場接過佢嘅信件，即刻問佢：「呢度係五星紅旗飄揚嘅地方，你喺度做乜嘢？」佢話當時只係想向CY表達訴求，但對方無理會，然後又突然回頭對住佢再講同一番說話，「問我嚟呢度做乜」，前後最少問咗3次。

家洛話自己當然係為咗表達訴求，政府有責任聽，但CY對唔同意見人士本能反應竟係「挑釁、排斥」，而唔係聽意見。

梁網誌回應 稱歡迎陳睇升旗

面對家洛嘅批評，CY選擇寫blog回應，佢喺中午時分上載咗篇網誌，以〈五星紅旗每天八時在辦公室前升起〉為題，提到佢喺行會開會前按慣例喺特首辦外接見市民，並看到「久違了的前立法會議員、浸會大學副教授陳家洛」，仲話當時係向家洛表明，「特首辦每天早上8時都會升起五星紅旗和區旗」，歡迎對方嚟呢度睇升旗。

之後CY又引述家洛上年接受訪問同撰文嘅說話，包括指家洛曾撰文講「試想像某天一覺醒來，那象徵着中國共產政權的五星紅旗升不起來了，這個政權真的倒了」。CY傍晚又喺fb上載一條長約20秒、影住國旗同區旗飄揚嘅短片。

家洛同Emily講，CY話歡迎佢去睇升旗嘅說法係講大話，批評CY一而再、再而三咁挑釁係心胸窄，話香港有咁嘅特首係好悲哀。