Google街景推出6年後翻新 攝影師孤身上路影勻全港
[2016.11.29] 發表
【明報專訊】Google早喺2010年推出香港街景服務，6年香港幾番新，好多地方面目全非，Google街景車噚日重新出發，嚟緊會穿梭港九新界嘅大街小巷，仲會首次入埋大嶼山南部，拍攝梅窩、昂坪同貝澳等地靚景，連香港絕大部分嘅行山徑都會包攬埋。但「軍營」喺Google嘅世界仍然係「謎」，因為仲等緊當局批准先影得。
首入嶼南 影埋行山徑
Google街景計劃亞太區經理魏薌君話，Google拍攝會以用家需要為先，眼見6年間咁多建築物唔同咗，又多咗新港鐵站，街景車會以港島西為起點，先影堅尼地城、西營盤等地區，再掃晒港島，再去九龍新界。魏薌君話，拍攝要視乎天氣同日照長短，加上香港路窄車多，如果有嘢擋住鏡頭就要再拍過，難度相對高好多，估計第一項更新至少要兩個月左右時間。
Google實力雄厚，但唔講唔知，拍攝全港街景呢個重任，同台灣一樣，都係得一個人做，呢名孤獨嘅攝影師就係喺Google工作4年幾嘅街景作業員何文豐。佢嚟緊會用街景車、街景三輪車、手推車同重18公斤嘅背包做嘢。何文豐原來已經慣咗攀山涉水，今年3月先去過狗牙嶺，佢話嗰度原來無梯級，要手腳並用爬上去，但由於都係熱門行山徑，佢都覺得值得拍攝。佢又同Emily講，街景圖連蒲台島都覆蓋埋，但東平洲同喜靈洲等就仲未有計劃影住。
Google發言人話，影番嚟嘅街景會有系統將車牌及人樣「打格」，唔擔心有私隱問題，亦有機制畀市民反映。
更多港聞
卿姐批「有人篤背脊就縮」 曾鈺成倡「不如你出來選」
【明報專訊】立法會前主席曾鈺成日前婉拒與前港督彭定康同場出席論壇引起關注，噚日佢出席一個有關特首選舉嘅論壇時，就被民主黨主席劉慧卿台下挑機，... 詳情
下月上任總幹事 民主黨蔡雨龍盼「黨校」加倍招生
【明報專訊】下月上任黨內總幹事嘅民主黨中常委蔡雨龍，噚日同傳媒茶敘大談工作大計，佢話上任後其中一個任務就係擴張「黨校」，希望吸納更多唔同行業... 詳情
【明報專訊】經民聯立法會議員梁美芬喺《明報》撰文，回應法政匯思任建峰上周三同樣喺明報撰寫嘅文章，提及對方鼓勵年輕人參與「佔中」和支持自決分子...
詳情
【明報專訊】由不同持份者組成的法團校董會可參與學校管治，校董會校友代表須由校友會選舉產生，中華基督教會基協中學校友會正制訂《校友校董選舉指引...
詳情
相關新聞
