【明報專訊】香港政府出版咗2015年年報，記錄去年香港發生嘅大事。立法會舊年6月表決政改方案，但發生「等埋發叔」事件，建制派「甩轆」，結果政改方案以8票贊成、28票反對，戲劇性地以大比數被否決。不過，政府年報嘅大事紀要只係簡單記述政改表決過程，話「在28名議員投反對票下，議案因未能獲得全體70名議員三分之二多數支持而被否決」，內文都無提「甩轆」事件同發叔。

大事紀要不見港中足球戰

年報有唔少「大事剪影」，除咗官員與外國政要見面嘅相，仲有多張香港運動員為港爭光相片，包括胡兆康喺美國拉斯維加斯保齡球世界盃封王，成為首位奪冠嘅港人，以及「cue后」吳安儀取得世界女子職業桌球錦標賽金牌等照片。

去年港中足球戰引起社會極大關注，港隊門將「英雄輝」葉鴻輝嘅英姿都有出現係「大事剪影」中，寫明「11月在旺角大球場舉行的世界盃足球外圍賽，港隊賽和中國隊」。不過，年報「大事紀要」表對港中大戰隻字不提，當中發生嘅噓國歌行為更加無紀錄。另外，年報當然唔少得特首梁振英嘅身影，有3張相都見到CY；至於財政司長曾俊華都有兩張；政務司長林鄭月娥就有4張相見到佢。