銅鑼灣書店店長林榮基上周返港爆料兼參加遊行，工黨主席李卓人並無現身參與，原來阿人有嘢做，去咗喺瑞典舉行嘅瑞典總工會大會活動(LO Congress)。銅鑼灣書店事件今次真係「揚威海外」，連各國出席工會大會嘅人士都表態關心事件。阿人話，瑞典食品工會代表喺會上提出議案，支持香港職工盟爭取人權及民主嘅努力，關注銅鑼灣書店事件，議案仲提及日前香港市民參加遊行撐林榮基。 阿人去瑞典都無偷懶，噚日去咗瑞典外交部，要求當地政府關注銅鑼灣書店負責人桂民海嘅情况，佢仲有同各地工會代表講吓香港嘅情况。被扣內地嘅桂民海有瑞典國籍，瑞典當局一直要求與桂會面，相信當地工會關心桂民海情况係有原因。 阿人邀諾獎得主來港談抗爭史 阿人喺當地開會都有乘機「集郵」，包括日前見到諾貝爾和平獎得主「突尼斯全國對話四方」當中突尼斯總工會秘書長阿巴西(Abassi)，阿人仲邀請佢來港講佢哋嘅成功抗爭歷史。
|
| |
| |
;)
