【明報專訊】喺佔領行動期間經常喺電視出現嘅「四點鐘許sir」許鎮德，無做警察公共關係科之後，去咗深水埗警區做指揮官。該警區近排就搞咗份刊物叫《深情》，宣傳警區內嘅工作，最近寄咗份畀Emily，封面仲係許sir嘅專訪。

篇專訪開宗明義就話，「相信警區同仁及廣大市民對這位曾經一度雄踞網上熱門搜尋人物排行榜前列位置的『四點鐘許Sir』相當感興趣」，所以就相約佢做個專訪。許sir讚揚警區同事做事努力，又話深水埗係一個多元化社區，居民同商戶之間有濃厚人情味同守望相助精神。Emily睇晒成份《深情》，發現包括封面嘅卡通嘜頭，許sir個肖像總共出現過13次，相信許sir同佢嘅fans仲有好多「深情」說話未曾講，嚟緊大把機會「見報」，不過份嘢暫時得中文，無得recap in English。