難忘少棒沙燕隊 財爺撐港片 恨睇《點五步》

曾俊華（後排右一）做過沙田助理政務專員，見證少棒隊「沙燕隊」成立，日前佢出席沙田一個少年棒球活動，就見番創立沙燕隊嘅盧光輝校長（左一）同一班現役「小沙燕」，令佢更想快啲入場睇以此為題材嘅港產片《點五步》。（曾俊華網誌圖片）

【明報專訊】財政司長曾俊華曾經講過自己係中產，例如鍾意飲咖啡同睇法國電影，今年財爺喺財政預算案提出注資2000萬元畀電影發展基金，支援粵語港產片喺內地發行和宣傳。佢噚日喺網誌就「澄清」，其實佢同好多影迷一樣，睇得最多嘅係荷李活電影同港產片，有時都睇吓意大利或者日本片，法國片嘅數目就較少，佢鍾意法國片呢個係美麗的誤會。

財爺話，電影發展基金除咗資助本地電影製作，亦都着重培育青年工作者，基金2013年推出「首部劇情電影計劃」，資助拍攝劇情片，早前喺香港國際電影節上映兩場優先場嘅《點五步》，財爺話故事圍繞1982年喺沙田成立嘅香港首支少棒隊「沙燕隊」，當年佢係沙田助理政務專員，親身見證盧光輝校長同一班小沙燕成立球隊、創造奇蹟嘅經過，佢話希望盡快入場欣賞《點五步》，睇吓30年前嘅勵志故事，今日係咪一樣打動人心。

「港產片係一道香港旗幟」

佢又話早前同一個資深製片人傾過，對方話內地目前最成功電影，幾乎清一色都有香港人製作班底，故事也具備港產片精神面貌，「與其說香港電影業不如從前，不如說香港電影業製作人跳出了原來的舞台，在更廣闊的天地發揮所長」，又話港產片絕對係值得珍惜嘅一道香港旗幟。

更多港聞

亞洲先生自薦選ViuTV先生

【明報專訊】亞視日前「熄機」，坊間卻未忘亞視。曾經參選亞洲先生嘅鄧簡文（圓圖），噚日喺港台《城市論壇》於台下發言，一邊大讚亞視，更趁機向出席... 詳情

機場清膠達人 確保跑道安全

【明報專訊】一般香港打工仔嘅工作模式都係日出而作、日入而息，不過喺24小時無休嘅香港國際機場，唔少員工就要喺其他人好夢正酣時，開始一日嘅工作... 詳情