【明報專訊】天寒地凍，大家真係要多啲關心老人家。民建聯立法會議員梁志祥噚日朝喺福利事務委員會上，就向勞福局長張建宗反映，話辦事處啱啱收到一對長者夫婦求助，話天氣好凍唔夠禦寒衣物。張建宗聽到都好緊張，問梁志祥攞長者資料，聞說會議未開完，社署地區嘅職員已聯繫到呢對長者。

議員立會反映 社署寒衣送老人家

梁志祥事後都讚張局長及政府工作人員，話當局已即時向求助人轉送棉被等禦寒衣物。張建宗喺立法會上都講，任何人有需要可以打社署熱線2343 2255求助。會議後，張局長下晝就走去土瓜灣唐樓探訪獨居長者，又去咗長者平安鐘中心為中心職員打氣。

至於特首梁振英(CY)日前去深水埗避寒中心探望露宿者，借題發揮批評有人阻住建屋而被人話「抽水」後，佢噚日就喺網誌圖文並茂，話自己去香港仔華貴邨探望90歲獨居長者陳婆婆。CY今次無再提土地問題，而係講佢媽媽，話阿媽晚年獨居，每次幫佢請家傭都被辭退，CY又話有一年，年過八十嘅媽媽農曆新年前自己大掃除，一個人爬梯抹吊燈，結果跌倒小腿骨折。CY話好彩佢哋將媽媽屋企嘅鎖匙，配多一條畀媽媽樓上嘅好鄰居呂太，而呂太其後發現佢媽媽跌倒，就偷偷打電話告知佢哋。