總商會變身「超級聯繫人」
[2016.01.23] 發表
【明報專訊】「一帶一路」近排成為潮語，「超級聯繫人」呢個詞都唔弱，政商界同京官都不停講，香港總商會都潮一潮，噚日總部擴充後開張嘅大喜日子都用「超級聯繫人」做剪彩儀式。
總商會主席彭耀佳、常務副主席吳天海、行政立法兩會議員林健鋒，同埋主禮嘉賓財爺曾俊華，齊齊揸住印有香港總商會標誌嘅USB頭接埋一齊。總商會發言人同Emily講，呢個動作喻意總商會可連繫各界，接觸全球，將商家、企業家、政府同世界各地商業連結，發揮互利共贏作用。
彭耀佳話總部大咗，會更好咁服務會員。財爺就好客氣話，總商會一直同政府合作，同聲同氣。不過財爺又好坦白話，有時亦有和而不同嘅時候，正可反映大家彼此係朋友嘅關係。總商會一直希望政府減利得稅，有利營商環境，寫緊預算案嘅財爺呢個補充，唔知係咪想閂後門呢？
更多港聞
相關新聞
