【明報專訊】特首梁振英(CY)噚日出席國泰航空「空中之旅」活動，同近250個來自基層家庭嘅小朋友及市民一齊搭飛機，遨遊香港上空。CY話自己加入政府前因為公務成日飛，呢幾十年加埋嘅飛行里數，應該等於環繞地球超過100個圈。佢又問到出席者，知唔知香港航空客運喺全世界排名第三，唔知一眾在場嘅大人細路，係咪都答「知」呢？

施政報告上星期出爐，CY噚日喺活動上無放過宣傳機會，話國泰作為一間企業，透過活動回饋社會、分享香港繁榮，就正正切合施政報告嘅主題，即係「發展經濟、改善民生、促進和諧、繁榮共享」，如果香港社會經濟繁榮發展，就可以招待更多小朋友搭飛機咁話。機場興建第三條跑道爭議不斷，CY噚日亦不忘向出席市民推銷，話香港需要三跑。