【明報專訊】立法會新東補選下周二正式接受提名，有意出戰嘅各路人馬開始明朗化。標榜中間路線嘅新思維亦拍板派人選，但人選未傾掂數，黨內要再爭一爭。召集人狄志遠透露，開會時有最少兩人表態有意出選，所以仲要再經內部遴選機制，等1月8日黨內投票決定。至於呢兩人係咪包括佢同黃成智，阿狄話具體人選未講得，但笑言「坦白講，你都講得七七八八」。據悉，黨內亦有年輕成員表示有意參選。 籌款宴請歌手 已攞晒牌 狄志遠話，新思維未試過大型選舉，唔清楚有幾多選票，所以「一定要行呢步」。對於泛民內部已協調由公民黨楊岳橋出戰，被問及會否擔心被人話「𠝹票」，佢就話呢個說法係「侮辱」，話如果退縮唔選，等於扼殺選民選擇機會。狄志遠又評估，新東補選一席任期得幾個月，對政治變動影響好細，相信即使泛民落敗，建制派都唔會利用機會夾硬修改議事規則。 不過，其實阿狄噚日開記者會時，只係話新思維「強烈傾向」參與新東補選，事關佢哋1月7號要搞籌款晚宴，驚講到咁明，參選要計選舉經費。佢透露到時會有拍賣環節，仲邀請咗歌手關心妍唱歌助興，但阿狄叫大家放心，話已經攞足所有牌照，笑言「唔會甩轆」出現版權問題。除咗唱歌、拍賣，仲有乜嘢節目？阿狄話，「你肯捐款，跳埋舞都得！」
|
| |
| |
;){kind=small}
;)
