【明報專訊】每屆區議會選舉，都會吸引唔少「特異人士」參選博出位。去年佔旺之時，高調撐路障嘅反佔中標誌性人物「光頭周」(周念慈)，事隔一年重返公眾視線，聲稱帶領10個、8個反佔中人士出戰區選。不過雷聲大，雨點小，光頭周噚日淨係同當時反佔中拍檔、廣西欽州市政協委員廖少輝現身，仲要表明自己只係幫手，唔落場玩。對於畀人懷疑佢有黑社會背景，光頭周就話，「江湖人士我一定識，不過政府人士我都一定識」。 廖少輝離人力獨戰尖沙嘴 不過，廖少輝嘅來頭更加特別，原來佢上屆曾經代表人民力量出選尖沙嘴區，但佢話因為與大家理念愈走愈遠，所以最後淡出。佢仲話自己𠵱家同黃毓民係好朋友，好欣賞對方。佢噚日就報名參選尖沙嘴中選區，再戰已報名嘅民建聯當區區議員關秀玲，同埋加利。 批派米搞旅行非地區服務 佔領運動將社會分為黃藍陣營，但呢班反佔領人士今次區選，就將矛頭指向建制派。光頭周解釋，建制派喺佔中嗰陣，怕得罪學生，無企出嚟指摘佔領人士，無盡到「效忠特區政府」嘅責任。 問佢哋會唔會有咩地區工作，光頭周話，自己曾參加過聖約翰救傷隊，都應算係為地區服務！佢又質疑「你哋理解建制派米，搞一蚊旅行團就算係服務咩？」
|
| |
| |
;){kind=small}
;)
