繪畫導師讚高錕作品有生命力

光纖之父高錕教授（中）噚日同太太高黃美芸（右）、繪畫導師Polly（左）一齊出席畫展，笑得鬼咁開心。

【明報專訊】患腦退化症嘅光纖之父高錕近年學畫畫，「高錕慈善基金」同又一城合作，呢個星期為高錕舉辦首個個人巡迴畫展，揀咗32幅高錕呢兩年畫嘅作品展出，希望大家欣賞畫作之餘，亦可以對腦退化症了解更多，作品稍後會做慈善義賣，收入全數捐畀高錕慈善基金腦退化症服務同相關公眾教育。

畫展噚日舉行揭幕禮，高錕同佢太太高黃美芸都有出席，高太話雖然高錕有腦退化症，但佢成日都有笑容，佢呼籲大家唔好歧視、多啲關心腦退化症患者。教高錕畫畫嘅導師就話，高錕係最難教嘅學生，因為高錕有要求，又鍾意新挑戰，佢話高錕每張畫都有生命力，感受到高錕對生命嗰團火。

導師話，高錕初初上堂時都覺得好陌生，所以都有不安同唔合作，高錕亦唔記得揸筆等技巧，不過佢學咗一個月，都可以畫出零碎嘅點同線，之後高教授更加進步神速，有時仲一路畫畫，一路吹口哨同講好多嘢𠻹。