【明報專訊】資深大律師湯家驊(Ronny)成立嘅智庫「民主思路」，辦事處噚日正式「開張」，唔少官員及政界人士都有去「撐場」，包括政制及內地事務局長譚志源、副局長陳岳鵬，同埋運輸及房屋局長張炳良。Ronny有邀請全體立法會議員出席開幕儀式，民主黨、公專聯、民建聯同工黨等都有立法會議員代表出席，但公民黨只有執委曾國豐出席。被問到公民黨議員無現身係咪唔畀面，Ronny回應話「我唔使人哋畀面」。 譚志源龔自珍詩勉Ronny 譚志源噚日同陳岳鵬「行孖咇」一齊現身，譚志源一貫其鬼馬性格，話本來想唱首《孤身走我路》畀Ronny，但見咁熱鬧就打消念頭。譚志源最終送咗晚清詩人龔自珍《己亥雜詩》嘅詩句「落紅不是無情物，化作春泥更護花」畀Ronny，意指即使離開政黨同議會，未來都可以別有洞天。 張炳良借「民主思路」主張嘅「第三條路」，去講佢負責嘅機場第三條跑道，話兩者都艱難，但大家都要努力推動。 盛智文加入做榮譽顧問 Ronny宣布海洋公園前主席盛智文加入擔任「民主思路」榮譽顧問，又話智庫係希望拉近中央同香港距離，並非排斥建制或泛民主派。Ronny已經退出公民黨，噚日只有前黨友曾國豐現身，佢話明白中秋節同區議會選舉臨近，大家都未必得閒出席，唔會放喺心。
|
| |
| |
;){kind=small}
;)
