【明報專訊】行政長官創新及科技顧問楊偉雄近日率領約50個資訊科技界人士訪京，一行人噚日同港澳辦副主任周波會面。楊偉雄無正面講究竟有無同中央官員談及點樣帶動香港創新科技發展，佢話今次訪京只係被邀請，訪京團亦係業界活動，但話對方提到希望香港有更多資訊科技人才，納入國家人才庫，帶動國家科技發展喎。

被視為「候任」創新及科技局長嘅楊偉雄，當然不忘繼續sell成立創科局嘅好處啦，佢話好多國家都將創新科技放喺政策前列，視為帶動經濟發展嘅重要一環，佢覺得成立創科局，可以將有關工作做得更全面，希望大家放開啲，為香港做事。

不過，有記者問佢，咁周波有無講希望盡快成立創科局呢？楊偉雄就話，訪問最主要目的係促進兩地業界交流，無討論其他問題。