【明報專訊】除咗民主黨有創黨成員退黨，最近連由民主黨分裂出嚟而成立嘅新民主同盟，亦有創黨成員退黨。噚日新民主同盟向傳媒發新聞稿，話收到沙田區議員容溟舟要求退黨嘅信件，執委會討論後接受對方退黨。新民主同盟副召集人鍾錦麟就話，黨都嘗試挽留對方但唔成功。
容溟舟都發聲明，話政府大興土木令地區有唔少爭議，雖然新民主同盟內都係好友，但自己喺黨內作用漸細，地區工作愈嚟愈繁重，無暇兼顧黨務，唯有退黨。
新民主同盟輪任召集人陳竟明就話，容溟舟退黨係損失，但明白佢一直專注地區政務，甚少參與組織決策，雖然惋惜，但會尊重佢嘅決定。
容溟舟2007年起當選沙田區議會大水坑選區議員，到𠵱家做咗兩屆，2010年政改後同范國威佢哋一齊創立新民主同盟，退出埋民主黨。不過佢喺新民主同盟內比較低調，一直無做過執委。
;)
