陳健波談功能組：自動當選因為做得好
[2015.07.14] 發表
【明報專訊】立法會功能組存廢一直具爭議，民主派經常批評功能組別不民主，但喺選舉中自動當選嘅保險界陳健波就批評市民被反對派誤導，指功能組別係零票當選嘅說法「離晒譜」，「功能組別內有人可以自動當選，係因為業內人士認為佢做得好，無人挑戰佢，所以唔係零票當選，而係全票當選」。佢仲批評有啲反對派直選議員多年來都係「呃飯食」，只識反對。
「唔係零票當選，係全票當選」
政改雖告一段落，但議員好識把握機會繼續就政改發言。噚日立法會大會討論選舉法例(雜項修訂)條例草案，本來係講明年立法會選舉嘅技術修訂，例如功能界別名稱同點票程序，但議員趁機大談功能組別存廢。有建制派繼續批評泛民否決政改；泛民就斥功能組別唔民主，一定要廢除。政制及內地事務局長譚志源都話唔少議員係借題發揮。
陳健波喺會上捍衛議會嘅功能組別，話「提供大量正能量，抵抗議會內嘅不合作運動，令政府可以順利施政」，仲話唔少功能組別議員嘅出席率比直選議員更高。功能組別議員亦一直關注基層、青少年福利，「香港絕對需要做實事嘅功能組別」。
緊接發言嘅社民連梁國雄向陳健波挑機話，「如果你覺得直選議員呃飯食，你咪走入直選度，淘汰佢囉……你嚟淘汰我囉，匿埋喺個甲殼度做乜？」工黨李卓人都大聲反駁話，功能組別議員梗係支持政府施政，因為功能組別係想維護自己既得利益，希望政府向業界傾斜。
更多港聞
【明報專訊】中文大學要求所有全日制本科生大學一年級必修體育，體育堂都安排男、女學生分班，但對於跨性別學生嚟講，揀班令佢哋頭痛又尷尬。中大學生...
詳情
【明報專訊】財政司長曾俊華早前提出拎5億元出嚟搞起香港時裝業，政府噚日就宣布成立一個「時裝業諮詢小組」，搵咗一班業界人士加入做成員，包括著名...
詳情
相關新聞
