【明報專訊】「醫療、房屋、教育」係內地人面對嘅3座大山。人稱「肥胡」嘅醫管局前主席胡定旭，最近獲委為國務院深化醫藥衛生體制改革領導小組專家諮詢委員會委員，幫手改革內地醫療體制。佢話自己係首個獲得國務院委任嘅香港人，要實實在在為人民做事，想幫內地人處理「看病難」之苦。
查找內地藥貴原因
Emily加把口話，內地醫院有事無事都叫病人打點滴(吊鹽水)，肥胡話內地嘅藥物好貴，工作小組要查找藥物咁貴嘅原因，仲話內地醫院主要採購有專利權嘅原廠藥，價錢當然貴。雖然內地人有醫保，但係醫院用嘅貴藥，七成唔包括喺醫保嘅藥物名單內，病人要畀七成藥費，自然呻慘。其實，醫院可以考慮採購專利權已過嘅非原廠藥物，價錢平好多，療效就同原廠藥差唔多。
話每日20幾個WeChat傾嘢
小組會先研究藥物體制改革，3個月後交報告，肥胡話好忙，每日幾乎有20幾個WeChat同內地傾關於醫療改革嘅事。佢話自己喺醫管局做咗15年委員，包括擔任9年幾醫管局主席，都想借助醫管局嘅管理經驗、知識，為內地醫療體制改革畀番啲意見。
;)
