【明報專訊】特首梁振英率領政制及內地事務局長譚志源、財經事務及庫務局長陳家強、民政事務局副局長許曉暉等官員上京拜會部委，雖然時間好匆忙，但喺經民聯立法會議員林健鋒安排下，陳局長及許副局前晚都同記者食消夜輕鬆聚一聚。幾個官員平時喺鏡頭前嚴肅講政策，鏡頭背後原來都鍾意揸咪唱歌。

消夜地點喺北京馬會舉行，嗰度有卡拉OK設備，向來多嘢講嘅譚志源，原來唱歌都啱佢！佢點咗唔少經典金曲唱番幾首，但去到北京當然要政治正確，佢同陳家強合唱嘅第一首歌，就揀咗劉德華嘅《中國人》，之後譚局長同林健鋒高唱《難為正邪定分界》，唔知有咩政治寓意？