【明報專訊】高登討論區一向係好多年輕人流連吹水嘅地方，近排爆出佔領行動，高登仔都活躍咗好多，繼早前有人喺高登號召封政府總部後，近日又有搞作，話要以高登仔名義參加明年嘅區議會選舉。原來早排有人喺網上寫咗篇文，講上屆區選有76個區議會席位係自動當選，於是有高登網民建議明年派人去呢啲區參選，等建制派候選人冇得自動當選。

「都係一份OK嘅工」

有網民話目標唔係想贏，而係想牽制保皇黨喺其他泛民主派有參選嘅選區部署，仲話「甚至一個唔覺意當選，都係一份OK嘅工」。佢哋又計過，按金只係3000蚊，攞多過5％票就可以拎番按金，如果以投票率四成計，大約160票就可以拎番按金。

將年輕網民聲音帶入議會

高登網民個post講到好認真，有4點參選活動目的，分別係「打亂建制派參選部署」、「防止因自動當選而議席自動落入建制派手上」、「偷雞」，同埋將年輕網民聲音帶入議會，「長遠劍指立法會」。佢哋仲諗埋冇可能76區都派人參選，所以諗住每個大區揀幾個細區主動進攻。佢哋嘅拉票對象目標係高登仔 、網上年輕群、家人親戚同埋中立街坊。