【明報專訊】建制派多次批評立法會大樓成為佔中基地，指泛民議員招待佔中喺立法會開會、瞓覺。噚日建制派又有發現，自由黨易志明喺建制派議員嘅WhatsApp群組發相，話喺垃圾桶發現安全套盒，仲要係「至尊超薄裝」(圖)。 Emily聽聞群組內議員熱烈討論，有人提出係咪要用特權法調查？有人講笑話新生命應該喺明年8月誕生，亦有議員「讚賞」有安全意識同節儉美德，唔需要畀酒店費。Emily問過易志明，原來相係佢影嘅，話係清潔工倒垃圾時喺10樓發現，易志明話工人只見到個盒，影咗張相，無摷吓究竟有無用過嘅避孕套。 同層有工聯人力等辦事處 10樓樓層有咩人使用呢？工聯會、人民力量、社民連同獨立黃毓民嘅辦事處都喺呢層，據聞其中一間會議室亦被佔中者徵用。民建聯葉國謙話對事件感驚訝，話點解咁莊嚴嘅議會大樓會發生呢件事，又話容易令人聯想10樓近日有好多佔中者過夜喎。 辦公室喺10樓嘅人力陳偉業知道咗就話﹕「咁過癮？證明呢度充滿生命力同挑戰！」但佢覺得有人懷疑係佔中者所為並唔合理，話點知係咪有人插贓嫁禍！佢仲講笑話，就算真係有人喺度發生性行為，都唔會咁張揚將安全套盒丟喺度。
|
| |
| |
;){kind=small}
;)
