【明報專訊】政府早前推出政改宣傳片，強調「有票梗係要」，中大新聞傳播系政改關注組就製作短片《如果MEDCAN只有三個餐》惡搞，扮職員貼出告示，指食材短缺，餐牌只得3個套餐，價錢由18.5至22.5元不等，但細心睇餐單，會發現除咗個名唔同，3個餐嘅材料一樣，都只係得奄列、雞扒、多士同沙律。 諷政改 餐名唔同材料一樣 面對咁嘅安排，同學被偷拍嘅反應都好唔同，有人睇完淨係識得笑，有人不滿到講粗口，亦有人話「即係咩嘢意思？即係冇得食啦！」。關注組希望，最終能夠表達出人大政改框架下「假普選」，令港人冇真正選擇，仲話canteen可以有好多間，但香港只得一個，市民應該努力爭取真普選。短片至噚晚已有近10萬人喺YouTube睇過。 MEDCAN平時好多人客，咁樣玩有冇影響做生意呢？Emily問過有份客串、喺呢間餐廳做咗19年嘅收銀員Amy姐，佢話同學仔係趁星期六朝早無咩人嘅時候先借嚟影一影，無影響生意，仲話有同學同佢講，若果餐廳好似特首選舉咁「冇得揀」就好弊。佢大派定心丸，話canteen向來有好多嘢食，唔使擔心。 Amy姐未有時間睇條片，但得知有近10萬人睇過，話多謝大家支持，佢都係想幫同學啫。
|
| |
| |
;){kind=small}
;){kind=small}
;)
