【明報專訊】「保普選反佔中」大聯盟噚日推出一條熱線2949 3193 ，接收市民舉報任何人喺中學公開策動罷課等資料。不過，呢條被人以諧音叫佢「搞四搞三」(9493)熱線公開約1個鐘，就畀「高登仔」打爆，完全打唔通。高登仔仲號召網民打電話去「叫外賣」，亦有高登仔問「喺咪可以打去29493193問六合彩貼士？」大聯盟發聲明譴責有人「未佔中，先佔線」 ，話如果情况繼續，就會報警處理。 舉報罷課熱線 收電話叫外賣 Emily發現噚日中午12點左右，就有高登仔發出「張融熱線電話：2949 3193」嘅帖，一個鐘後就有網民話打唔通。除咗打電話「叫外賣」，仲有網民列出建制派立法會議員曾就讀嘅中學資料，例如民建聯鍾樹根同李慧琼，話要打電話去舉報呢啲「同學」罷課。 籲改用電郵 網民出帖狙擊 大聯盟見唔對路，發聲明批評有人妨礙正常熱線運作，「不斷致電，內容騷擾，搗亂，謾罵」，形容係「猥瑣劣行」，呼籲有意提供中學生參與佔中或罷課嘅情報嘅人士，可改用傳真或電郵提供情報。不過，無幾耐Emily就喺高登見到「張融電郵：sign4peace@yahoo.com.hk」嘅帖。
|
| |
| |
;){kind=small}
;)
