【明報專訊】有智庫公布全港首個全面「育兒成本計算機」，畀有意生育嘅人簡單計算由媽媽第一日懷孕，直至仔女22歲，喺本地大學完成首個學位課程所涉及嘅開支，發現中產家庭要投放總共約550萬喺每個仔女身上，但若要「平價套餐」，唔讀私校，就只需約98萬元。 計埋通脹 中產家庭要720萬 智經研究中心話，喺網上論壇蒐集過中產普遍認為育兒基本所需嘅項目，包括遊戲小組、學前預備班、私立幼稚園、直資中小學、定期嘅長線及短線外遊等計算在內，不分年齡平均除開，發現每月支出約需20,826元，總共需約550萬元，計埋2.5%通脹，要成720幾萬。呢個數仲只係包括喺香港讀書，未計海外升學費用。智經主席李國棟話香港百物騰貴，競爭激烈，為咗向子女提供一切所需，家長嘅經濟負擔有增無減。 不過育兒「有平有貴」，最緊要用心照顧仔女，如家長揀公立學校，淨係參加學校搞嘅免費興趣班，又減少外遊次數，其實育兒總開支亦可低至約98萬元，即係每月需約3712元。 智經話，計算機入面嘅數據只係概括畀大家參考，唔希望大家畀數字嚇親，有興趣計吓有關使費，可以到以下網址﹕http://www.bauhinia.org/calculator.php
|
| |
| |
;)
