【明報專訊】解放軍駐港部隊噚日喺槍會山軍營搞捐血活動，經過駐軍醫療部門預先檢查報名軍人嘅身體情况，最終有400名軍人一共捐咗約18萬毫升血，當中有15個女兵。21歲嘅安徽女兵張秋婉就話，自己第一次捐血，既緊張又興奮，仲話幫到香港市民，覺得特別驕傲同自豪，下年都想再捐。

駐港部隊副司令員董朝話，關愛香港人身體健康係佢哋義不容辭嘅責任同義務，之後駐軍都會繼續參加捐血。

另外，伊波拉疫情未受控，香港紅十字會輸血服務中心更加小心，即日起，去過幾內亞、塞拉利昂、利比里亞同尼日利亞嘅人，要離開呢4個地方至少28天後先可以捐血，中心發言人話咁係要確保血液安全，但唔會影響血液供應。