戴耀廷痛風發作 巧遇醫生支持者

戴耀廷喺facebook上載右手因為痛風而要戴護理手套嘅相，唔少網民留言建議佢點樣治理痛風，佢話非常感謝大家，又表明最重要係戒口，「但最難也是戒口」。（網上圖片）

【明報專訊】之前因為痛風揸過拐杖行路嘅佔中發起人之一戴耀廷(Benny)，喺星期日痛風又發作，佢當晚去私家醫生求醫，就遇到兩個醫生支持者嘅奇遇。

引述急症醫生：考慮外圍支援

Benny喺facebook透露周日晚因為痛風發作，右手突然腫得好厲害，所以喺夜晚去睇醫生。Benny話急症醫生認得佢，好支持佢，仲話雖然唔可以參加公民抗命，但就會考慮參與外圍嘅支援工作。不過，醫生話目前最重要係將佢醫好，所以就急電另一個私家專科醫生幫Benny診治。專科醫生趕到亦話，Benny嘅工作對香港太重要了，所以一定要諗方法醫好佢喎。

Benny話聽咗兩醫生嘅說話深受鼓勵，因為兩人嘅言論代表香港社會仍有唔少人對民主有渴求。Benny又話好多人未必會走去公民抗命，但仍會喺工作崗位上付上代價。

Benny又話，面對「東施效顰」式、「指鹿為馬」式同「掩耳盜鈴」式嘅「反佔中」簽名，有咗佢哋嘅鼓勵，即使身心俱疲，或者受着各方打壓，仍會發現仲有好多好多同路人。

更多港聞

謝偉俊談佔中：為理想可接受

【明報專訊】立法會議員謝偉俊（Paul）噚日出席一個商會活動，分析青年人對議會印象嘅調查結果。有記者問阿Paul點睇議會外嘅佔中行動，阿Pa... 詳情

孫明揚設計程式賭馬

【明報專訊】噚日現身高院為許仕仁案作供嘅前房屋及規劃地政局長孫明揚（孫公），雖然要隔日洗腎，但連日嚟要上庭都唔覺辛苦，作供後仲同記者講波、講... 詳情