孫明揚設計程式賭馬
[2014.07.29] 發表
【明報專訊】噚日現身高院為許仕仁案作供嘅前房屋及規劃地政局長孫明揚(孫公)，雖然要隔日洗腎，但連日嚟要上庭都唔覺辛苦，作供後仲同記者講波、講馬，眉飛色舞。Emily問出名係曼聯躉嘅孫公之前有無睇世界盃，佢話梗係有啦，佢話捧荷蘭，因為有「戰術大師」、曼聯新帥尹戈爾坐陣。
同曾蔭權食過飯
曼聯之前熱身賽大勝洛杉磯銀河，孫公笑指「好耐未試過7比0」。Emily再問佢曼聯來季有無機會贏英超冠軍，佢就話「睇吓佢收買咩人啦」。Emily估孫公係指「收購」球員嘞。
講起賭馬，孫公話自己用咗成年時間，設計咗個「方程式」分析賠率，不過都唔係必勝嘅，都有輸少少。講起退休生活，孫公話自己唔飲茶唔飲酒，但會上跑步機行吓，又同過「煲呔」曾蔭權食飯一兩次，不過自己唔可以食太多嘢。
更多港聞
相關新聞
