【明報專訊】特首梁振英(CY)上任一年幾，叫佢落台之聲此起彼落，但年輕人氣歌手G.E.M.鄧紫棋就話，打開報紙，見到從早到晚都有人叫特首落台，反而令佢覺得「嘩﹗使唔使呀？」G.E.M.話市民應該靠自己，叫大家唔好再畀壓力CY，仲話想同CY講句「加油」。此文得到大公網「垂青」轉載，不過，佢撐CY嘅言論就難免引起網民歌迷反響。

叫CY落台 G.E.M.：嘩﹗使唔使呀？

G.E.M.喺智庫組織香港集思會刊物《90後有話說……》叫大家先唔好批評CY做得好唔好；講到政策，佢就話「你問我政府可以怎樣幫助年輕人？我又不是 expert(專家)」，佢認為人最終都要靠自己，重點唔係要求政府畀你多少錢和福利，「 at the end(最終)都是在乎你怎樣面對」。佢話，特首呢份工，角色實在好難做，佢唔想再對特首施加壓力，想畀佢一份鼓勵。

G.E.M.話，希望自己嘅音樂，可以為觀眾帶來動力同鼓勵。對於佢嘅撐CY言論，有啲fans表示失望，有網民批評G.E.M.唔知民間疾苦，作家喬靖夫噚日更喺個人facebook留言，不點名話G.E.M.識得去剪punk頭，但唔識punk嘅反建制精神，竟向極權代理人講「加油」，佢仲批評G.E.M.「偽punk，不如不punk」。

粉絲失望 喬靖夫批「偽punk」

面對有人鬧佢，G.E.M.噚晚喺個人facebook話，呢篇訪問喺今年4月底做，當中分享嘅唔係政治立場或取向，而係佢對社會嘅一種感受。佢話大家都希望爭取普選，但延續呢啲怨氣，並唔能夠改變任何事情，相反令我哋心境「充滿苦毒」。

Emily希望用番G.E.M.嘅說話安慰一眾fans，at the end(最終)都係在乎你點面對。