【Emily】日本返港 籲「唔好咁傷心」 機艙廣播：返工搵錢無得避
[2024.01.27] 發表
【明報專訊】近日社交媒體流傳一段話係香港快運(HK Express)嘅機艙廣播片段，引起唔少網民熱議。香港快運航空噚日回應話，暫時未確認到片段係咪同香港快運機組人員有關，不過作為一間富創意及活力嘅本地航空公司，都希望持續了解點樣為顧客帶嚟一個難忘又稱心嘅飛行體驗。
未證涉員工 快運徵機艙「窩心時刻」
從片段所見，航班降落香港機場時，有機組人員透過機艙特別廣播，以廣東話安慰乘客，話由日本返到香港唔好咁傷心難過，「返工搵錢係無可避免」，但遺憾地，香港將氣溫降到7℃，要注意保暖，「早啲休息，聽日再著多啲衫，好好上路」，又叫大家「返工加油」。
香港快運航空話，留意到最近網上流傳嘅片段，正了解緊事件，由於網上片段資訊有限，暫時未能確定係咪來自香港快運機組人員，但公司一向就機艙廣播有既定指引，以確保內容符合法規同公司品牌形象；同時會喺社交媒體展開「UO窩心時刻招募」活動，誠徵網民分享曾經喺香港快運機艙遇過嘅「窩心時刻」。
更多港聞
【Emily】機場櫻花園今開放 新品種好運來迎客
【明報專訊】機管局舊年起喺機場島開設櫻花園，開放畀市民賞櫻，今年花季將至，局方噚日公布櫻花園會今日起開放，而今年局方種咗一款更適合香港天氣嘅... 詳情
相關新聞
