【Emily】藝穗會獲續租至出年3．31
[2023.04.05] 發表
【明報專訊】今年3月底租約期滿嘅中環藝穗會，獲政府續租一年，較剛過去嘅5年租約短，但暫時可喺現址、一級歷史建築舊牛奶公司倉庫南座留多一陣，繼續同旁邊嘅香港外國記者會做鄰居。藝穗會續租後，出年3月31號租約屆滿，政府同時話會喺今年中向非牟利營辦商徵求建議書，喺出年租約期滿後營運。雖然政府喺新聞稿提及藝穗會都可以入紙，但令1983年成立至今嘅藝穗會可唔可以留喺現址，就仍然有個大問號。
藝穗會創辦人謝俊興早前退休，現任董事會成員之一、導演司徒永華回覆查詢時話，藝穗會一向都係睇長遠，唔會諗話一年或三年之後點。
政府發言人就話，決定畀藝穗會續租一年時，已考慮藝穗會現時嘅營運情况，同埋向中小型藝團提供空間同設施嘅需要。
更多港聞
相關新聞
