【Emily】劏房戶為子置二手鋼琴 鄧炳強探訪讚得獎爭氣
[2022.09.05] 發表
【明報專訊】新一屆政府話要處理跨代貧窮問題，司局長不時落區探訪基層，保安局長鄧炳強噚日就去觀塘探劏房戶。安排官員探訪嘅觀塘區議會主席柯創盛(柯仔)話，其中一戶一家四口住劏房，大仔彈樂器有天分，雖然家境一般，但媽媽死慳死抵都要買一部二手鋼琴畀囝囝，鋼琴已佔斗室近半空間，而小朋友都好叻，喺校際比賽拎到冠軍。柯仔話，小朋友就讀嘅學校有支援教樂器，等佢可以喺屋企練習；又指呢個住戶已申請公屋幾年，最大願望係盡早上樓。
鄧炳強都話對彈琴小朋友嘅故事感受深刻，話呢家人喺生活面對好多挑戰，但正面樂觀，而囝囝亦好叻好爭氣。
今次探訪活動陣容算龐大，鄧炳強拉埋海關副關長陳子達、入境處副處長郭俊峯，以及觀塘民政事務專員林兆康等人，去探區內4個劏房戶，柯仔話未來會繼續邀請唔同官員落區。佢又話政府提出嘅「共創明『Teen』計劃」，以師友方式幫助劏房兒童係好事，如噚日獲探訪嘅住戶，都想子女可參加；但佢指呢項計劃只有一年期，應持續跟進去做。
更多港聞
【明報專訊】早前卸任安老事務委員會主席嘅行政會議成員林正財，最近接受中新社專訪，大談點樣應對安老服務嘅三座大山，即係「錢」、「地」、「人」。...
詳情
相關新聞
