【Emily】海員大罷工百周年 黃國盼中山公園立碑

【明報專訊】今年係香港海員大罷工100周年，工聯會除上個月舉辦研討會外，理事長黃國亦去信發展局同民政及青年事務局，希望政府協助喺香港海員工會前身「中華海員工業聯合會」原址附近，即德輔道中137號設立路標，並喺中山紀念公園內立紀念碑，但佢發現無一個部門負責。黃國認為政府保育政策往往着眼喺古蹟，好似只有經過古物諮詢委員會評級嘅建築物，先有機會保留，佢以珍寶海鮮舫為例，因為唔係古蹟，所以無納入保育，其實係忽略咗背後嘅歷史、社會意義同市民嘅感情。

去信多個政府部門 稱無一負責

黃國話，當年中華海員工業聯合總會嘅工人，為咗反種族歧視、爭取香港海員合理工資待遇，喺1922年發動持續56日嘅大罷工，形容事件喺中國工人運動史等多方面，有重要地位同歷史意義，但過去佢同工會負責人去信過多個政府部門，希望喺工會原址設立路標等，發現無一個部門負責。佢認為市民嘅保育意識愈來愈高，而且唔限於某種建築物，歷史留下嘅痕迹都牽引人嘅歸屬感，對愛國教育極之重要。