【Emily】憶反修例時被朋友斷交 大學生輔警想當年：蛻變自信獨立
[2022.07.09] 發表
【明報專訊】警務處噚日喺facebook宣傳輔警招募，並分享2003年首屆「輔警大學生計劃」參加者郭德貞嘅感言，佢話參加計劃令自己蛻變成一個自信、獨立、善於溝通嘅人，完成計劃後擔任輔警至今。郭德貞話2019年反修例運動期間，體會到警隊不屈不撓、義無反顧保護巿民嘅精神，感到自豪同驕傲。
警隊每年都會舉行「輔警大學生計劃」，招募大專學生做輔警。首屆參加者郭德貞分享心路歷程，佢話當年暑假參加輔警「特別基本訓練課程」，內容包括射擊、步操、體能訓練、拯溺、遇抗控制術，並學習戰術訓練、人群心理學、法例、警務知識等。佢話完成為期兩個月嘅課程後，由「少不更事的年輕人」，變成自信、獨立、善於溝通嘅人。佢通過考核後擔任輔警至今，話反修例運動期間自己被朋友單方面「斷交」，雖然承受莫大壓力，但仍然與同袍並肩執法，當更共300小時。
今年嘅「輔警大學生計劃」已截止報名，不過輔警全年均開放招募，符合學歷、語言同體能要求嘅香港永久居民都可以申請。另外，警察招募組同少年警訊今日會喺會展舉行嘅香港國際教育展擺攤位，介紹投考資訊。
更多港聞
相關新聞
