【Emily】交通燈試驗「紅光照地」 提醒路人勿亂過

【Emily】交通燈試驗「紅光照地」提醒路人勿亂過

[2022.07.06] 發表

【明報專訊】市民最近喺銅鑼灣波斯富街同富明街交界過馬路，如果咁啱係紅燈，可能會發現路面好似有灘紅油，原來係運輸署嘅新裝置。運輸署噚日公布正推行一項為期約6個月嘅試驗，喺行人過路處安裝新型輔助裝置，於「紅色人像」燈號着燈時，裝置會將紅光投射到行人路嘅等候位置上，提醒行人尤其係「低頭族」留意燈號，唔好喺紅燈時過馬路。

運輸署話，新裝置嘅安裝臂係從交通燈號桿向橫伸延，並喺另一端安裝發光二極管照明模件，紅光嘅強度會隨住周圍光線情况自動調節，而裝置發出嘅紅光對行人係安全嘅。

波斯富街已安裝本月增3處

波斯富街同富明街交界嘅裝置已完成安裝，運輸署計劃今個月內喺另外3個地點安裝同樣嘅裝置，包括荃灣街市街近仁濟醫院行人過路處、沙田正街近沙田市中心巴士總站行人過路處，以及窩打老道同禧福道交界。