【Emily】前區議員黃文萱開書店 今個月搞六四主題

黃文萱（圖）喺深水埗開設嘅書店會定每月主題，6月就選擇推廣六四事件書籍，玻璃上仲貼上1989年藝人出席《民主歌聲獻中華》嘅圖片（右）。（黃振豪攝）

【明報專訊】前公民黨員黃文萱去年辭任區議員後，近月轉行做老闆，同拍檔開書店，文萱話書店每月都會諗主題推廣，今個月主題就係六四事件。書店除咗列出一啲講述六四嘅書，仲有展示一啲非賣品嘅雜誌刊物，Emily發現當中有被中學列為「禁書」而要「下架」嘅書刊，包括一本以北京民主女神像做封面、記述1989年4月至6月9日期間京城每日事態嘅《悲壯的民運》。

寄賣民主派朋友產品 包括「47」元手工啤

文萱嘅書店開喺深水埗黃竹街，取名「獵人書店」，呢區現有唔少咖啡店、文藝商店，成為文青聚腳點。書店除咗賣書，仲寄賣文具、酒等，部分貨品其實係民主派朋友「失業後」轉行搞嘅小生意產品，當中一款手工啤酒，堅持每支售價「47」元，文萱話啤酒係民主派初選案47名被捕者之一嘅馮達浚，同朋友共同創立嘅「放風」品牌啤酒。

生意啱啱起步，書店佈置都幾典雅，仲有梳化椅畀人坐。文萱話，佢主要喺網上買二手家具，裝修就係上一手租客留落嘅，所以唔使花太多錢搞裝修。

更多港聞

【Emily】長沙灣過渡房紅黃雨下動土

【明報專訊】政府近年積極推出過渡房屋，由基督教家庭服務中心興建及營運嘅「長沙灣長順街過渡性房屋項目」，就喺噚日下晝於紅色暴雨警告下舉行動土禮... 詳情