【Emily】「懷緬治療」 助腦退化港移民 締回憶 九巴站牌捐澳洲老人院
【明報專訊】唔少移居外地嘅長者都會掛念早年喺香港嘅生活,巴士站牌係其中一樣勾起回憶嘅事物。九巴最近向澳洲一間安老院捐贈巴士站牌,安老院將走廊改造成候車站,除放置站牌,亦投射巴士駛經香港街道嘅畫面,等早年移民澳洲嘅長者可以「故地重遊」,仲有助防止腦退化症長者走失。
走廊變車站 投射街道畫面
澳洲墨爾本華人護老院「安老之家」飯堂門外,今年初增添咗一個九巴候車站,站名正正係「安老之家」,唔少老友記每日得閒會坐喺長櫈度「等車」。「安老之家」超過四成長者曾喺香港長時間居住,項目經理Freddy話,長者喺安老院住得耐,對時間觀念漸漸唔太好,尤其有腦退化症嘅,好多時會想「出街買餸」,於是佢哋構思喺老人院仿製一個巴士站,期望透過熟悉場景進行懷緬治療。佢哋去年底向九巴查詢,獲九巴捐贈站牌,呢個亦係九巴第六個捐贈嘅巴士站牌。
負責構思嘅建築師Vincent話,站牌面向電子屏幕投射嘅巴士及路面,同真實比例一樣,希望增加代入感,所投射街道亦係按照長者以往曾居住地方度身訂做。佢期望將走廊改裝成巴士站後,可連結長者嘅回憶,將空間賦予意義。