【Emily】M+即場炒人 員工呆咗 西九管理局：面對嚴峻財務挑戰

【明報專訊】西九文化區財政多年見紅，當中嘅M+博物館噚日重開，Emily聽聞M+本月較早前請個別本地員工食「無情雞」，咁啱撞正M+新董事局主席陳智思上場後第一次見員工，聽聞情况都有啲尷尬。

綜合多方消息，陳智思本月上任後第一次視像見員工，介紹吓自己同文化藝術淵源，之後西九行政總裁馮程淑儀就突然證實裁員，部分人係相當資深嘅員工，有人形容聽到消息「呆咗」。另有消息話，被裁員工係被叫返去西九M+辦公室，然後即場被裁，喺保安望住情况下執嘢走，有人慨嘆做法「衰過做投行」，雖然人數唔多，但軍心都有啲受損。

西九文化區管理局(管理局)回覆查詢，話管理局面對嚴峻嘅財務挑戰，因應董事局於2022/23營運計劃中為控制營運赤字而設嘅整體撥款上限，管理局需減省營運開支及精簡架構以提高成本效益和效率；西九文化區已由建築期步進營運期，管理局各文化機構及部門均有需要檢視及改革其營運架構，以滿足部門最新發展和營運要求，並確保資源用得其所。管理局又話，有關架構重組嘅工作已完成，正積極開拓更多收入來源。