【Emily】G6見林鄭 陳健波倡中學開Gym房

「6人組」立法會議員噚日見特首林鄭月娥（中）提交《施政報告》建議，保險界陳健波（右三）就建議政府推出鼓勵市民做運動嘅措施。（謝偉銓提供）

【明報專訊】東京奧運令港人對體育多咗關注，保險界議員陳健波噚日向特首林鄭月娥提交對《施政報告》嘅建議中，唔少係希望政府鼓勵市民多做運動，例如鼓勵學校舉辦更多校際運動比賽，資助中學開健身中心畀學生用，喺公園開更多太極班、健康舞蹈班鼓勵長者參加，以至研究公營機構彈性上班，鼓勵員工做運動等。

提議破格擢升青年 抵抗移民潮

陳健波喺立法會所屬嘅板塊「G6」噚日同林太見面，波哥話推動健康政策有助應對人口老化，建議政府增設適合一般市民嘅運動設施等。現時年輕人向上流動困難，波哥又建議喺移民潮下，政府同公營機構可考慮帶頭破格擢升有能力嘅年輕人，為社會開創風氣，另為人才流失嚴重嘅行業推出培訓課程，幫青年提升技能等。

同屬G6嘅建測規園界議員謝偉銓提出3招，建議政府加快覓地建屋，包括推動新界「城鎮化」，全面檢視並提高新界土地嘅發展密度，重訂土地用途分配，例如生態保育價值偏低嘅綠化帶及自然保護區、已荒廢及不再適合耕種嘅農地等，以及全速檢討各項相關法規同程序，包括城規條例等，增強政府嘅「促進者」角色。