【Emily】律政人員「升仙」 法案委會兩個鐘傾完
【明報專訊】畀喺律政司工作、非大律師嘅律政人員可獲考慮委任為資深大律師嘅《2021年法律執業者(修訂)條例草案》,上月中首二讀,大律師公會已表明業界存在強烈反對聲音。相關嘅立法會法案委員會噚日用咗兩個鐘多啲就已完成工作,7月底嘅首次會議只選舉主席。委員會主席、新民黨容海恩(Eunice)本周五會喺內會報告,之後修例將喺大會恢復二讀。
主席容海恩:條文簡單 畀足時間
對於法案委員會開一次會就完成工作,Eunice強調條文本身簡單,喺會上已畀足時間,亦做咗5輪提問,用咗約1小時45分鐘先進入逐條審議,之後加會半個鐘先完成。佢話自己喺會上關注律政人員成為資深大律師後,又唔使加入大律師公會、唔使交會費,亦都唔受大律師公會監管嘅問題,不過由於律政人員離開政府嘅話就會失去資深大律師頭銜,唔會同私人執業嘅資深大律師爭生意。
Eunice近期肩負數職,除咗呢個委員會,仲係劏房租管、「窺淫罪」、「起底罪」嘅法案委員會副主席。佢笑言自己係「百搭副主席」,要留意時間安排,平衡各委員會進度。