【Emily】工聯會工人醫療所70歲 設專科門診
[2020.12.23] 發表
【明報專訊】工聯會工人醫療所原來已成立70年，過去幫助好多基層病人，工聯會噚日喺facebook上載醫療所成立嘅歷史，透露決定喺70歲大日子成立專科門診中心，預計明年首季投入服務。
影片介紹，香港喺1950年代，社會醫療設施極度短缺，勞苦階層患病得唔到診治，工聯會喺1950年7月借用港九勞工教育促進會半邊會址做工人醫療所，當時地方狹小，騎樓、走廊、樓梯時常迫滿就診工人(圖)。1955年工聯會按西醫門診方式成立中醫診所，發展至今有10間中醫診所，係香港主要中醫服務提供者之一；另外亦有6間西醫門診、5間牙科診所等。
工聯會工人醫療所醫務總監黃德祥話，最近介紹長者到公立醫院睇內科，但要等兩年，工聯會遂成立專科門診服務，提供耳科、眼科、婦科等專科服務畀基層，希望基層唔使等咁耐，與公院互補不足，幫手先照顧病人。
有50年前嘅服務使用者話，當時一個五金工友患肺病，那時一日人工唔夠兩蚊，冇錢睇醫生，工聯會醫生聽到後自掏荷包畀15蚊工友去另一名醫生度照X光，另外只收佢兩蚊睇症費。
更多港聞
【Emily】郵政售境外郵品 有「哆啦A夢」Miffy
【明報專訊】鍾意卡通人物嘅郵票迷又有新玩意，香港郵政噚日宣布，由今日起發售內地、澳門及海外集郵品，包括日本郵政發行嘅「哆啦A夢」、「Miff... 詳情
【Emily】除夕倒數移師網上 播片迎2021年
【明報專訊】第四波疫情持續，旅發局之前話今年唔會喺維港兩岸放煙花倒數，亦唔會好似上年咁搞網上大抽獎，咁仲有咩好搞呢？旅發局噚日宣布首次將「除... 詳情相關新聞
