【明報專訊】民主黨深水埗區議員袁海文噚日喺facebook上載照片，話民建聯立法會議員梁志祥辦事處掛出告示，要求最近到過內地嘅人避免入內，話措施係顧及公眾利益，絕無歧視成分。袁海文話，見近日有組織批評食肆歧視內地人，仲叫平機會查，佢忍唔住問連民建聯都驚內地回港者高風險，咁食肆係咪要學梁志祥貼一句「顧及公眾利益，絕無歧視成分」，先可以免被道德勒索。

話唔係佢職員掛 為引起不快致歉

祥哥話收到Emily查詢先知件事，了解過後話係坪洲辦事處嘅告示，但就唔係佢嘅職員所掛。祥哥解釋，該辦事處係同離島婦聯共用，離島婦聯掛出告示嘅原意，係擔心曾經到內地嘅人，出入辦事處會交叉感染。祥哥話自己絕對唔會出呢啲告示，咁樣寫都唔係太好，已經向離島婦聯投訴，相關告示已收起，如果有人因為張告示感到不安或者唔開心，佢願意道歉。