【明報專訊】美國總統特朗普向全體參、眾議員發表國情咨文演說，香港眾志羅冠聰早前喺facebook出post，透露獲參議員Rick Scott邀請出席。阿聰噚日報告演說情况，佢透露，每個參眾議員都只得一個嘉賓邀請名額，慣例係邀請伴侶，如果有議員願意邀請其他嘉賓，目的就係想發放一啲明確、重要嘅信息。

認為美議員想發放信息

阿聰話，今次可能係歷史性地首次邀請香港社運人士出席，相信目的係向中國發出信息，美國政界仍然相當關注香港、鼓勵港人為民主自由抗爭。阿聰話呢種支持係朝野兩黨共識，喺佢進入會議廳前，前廳有招待嘉賓、議員嘅社交場合，透露佢無論同共和黨、民主黨議員寒暄後，對方都非常關注香港狀况，唔少議員同佢講，香港議題係「極少有呢段時間兩黨會有共識、會溝通嘅議題」，「Carrie(特首林鄭月娥)今次we connect真係唔單止影響香港，仲影響埋全世界」。有見及此，阿聰相信香港唔會咁快喺國際舞台消失。