【明報專訊】全城搶口罩，即使有錢都買唔到，好多市民搵區議員求助，希望佢哋幫手搵貨，但部分街坊似乎當區議員「萬能」，可以隨時搵到口罩派畀大家，唔少區議員就喺網上嘆道，話有街坊提出太多不切實際嘅建議，例如叫區議員搵部可以整口罩嘅機返香港；亦有區議員喺網上聲明「我不是口罩供應商」，希望街坊體諒一時三刻派唔到口罩。

區議員：我不是供應商

元朗區議員張秀賢喺facebook話，作為區議員只可以盡力搵貨源，睇吓可唔可以做到團購或代購，「我必須要同大家講清楚，我唔係黃大仙，亦都唔係嗰班每月淨袋30幾萬，只係做3日就賺到區議員份糧嘅高官」。佢話，做區議員人手、資源、心力、時間都有限，無可能樣樣嘢都做得到；並無奈地透露，收到市民建議佢搵部可以整口罩嘅機械返香港。

觀塘區議員陳易舜強調自己已經盡力幫大家搵口罩，喺網上公開聲明「我不是口罩供應商」，希望街坊體諒。

曾任區議員多年嘅人民力量立法會前議員陳偉業就喺張秀賢facebook留言，希望啲民選區議員唔好公開投訴居民，又建議全體民選議員可以要求台灣總統蔡英文提供協助，「佢可能會願意送口罩畀香港市民」。