【明報專訊】反修例風暴下，唔少大型演唱會都取消，但本周六晚上，喺尖沙嘴文化中心會有一場大型演奏及演唱會舉行，參演者包括立法會前主席曾鈺成、經民聯主席盧偉國，以及Liza姐汪明荃等。盧偉國話，呢場係香港中樂團嘅籌款演出，中樂團歷史悠久，好值得支持，希望屆時社會平靜，等演出可以順利舉行。佢話近幾星期社會氣氛相對好少少，多咗人出街，話咁快聖誕新年，大家都想開心少少。 今次籌款演出，由Liza姐擔大旗演唱，並擔任籌委會主席，帶領多名音樂發燒友演出。曾鈺成會伙拍周潔冰唱《琵琶行》，盧偉國話佢負責演唱《輪流傳》、《倚天屠龍記》、《誓要入刀山》3首歌，呢3首歌都係顧嘉煇作曲、黃霑填詞，鄭少秋原唱嘅，盧偉國話因為佢非常欣賞呢個組合喎。
|
| |
| |
