【明報專訊】反修例風暴至今5個月，唔少年輕人身心受創。世界冠軍級口琴家何卓彥(Leo，圖)，上年獲委任入青年發展委員會，噚日喺facebook宣布請辭。佢話「年輕成為死罪，無數生命和心靈被政權摧殘，早把我僅餘的一絲倚望奪去。不是誰放棄誰，道不同不相為謀而已」，又提到希望有日「你們真的會聽，會聽，會流淚」。

「無數生命和心靈被政權摧殘」

Leo同Emily講，科大生周梓樂離世係沉重事件，令佢思考可以為呢位同學同香港做啲咩。佢話作為音樂人可以做嘅事唔多，佢亦唔敢「帶風向」，但會全力支持為香港盡心盡力、有良心嘅人。佢喺fb上載請辭電郵截圖，話請辭係因為工作同委員職務嘅時間不能兼容；信末說，「願平安與香港同在」。

有網民留言多謝佢以行動表示心意；亦有人批評佢喺正式請辭信以時間安排困難為由推搪，「轉彎抹角」；Leo回覆，封信想用「公事公辦」嘅態度寫。